Historia de Roma desde a súa fundación (Libros I-III)

Ab urbe condita (Historia de Roma desde a súa fundación) é unha extensa historia de Roma composta por 142 libros, dos que só se conservan 35. A obra relata o desenvolvemento de Roma desde as lendas da chegada de Eneas a Italia e a fundación da cidade por Rómulo ata a época de Augusto. Nos tres primeiros libros, obxecto desta edición, Livio describe as orixes míticas de Roma, a época dos reis, a instauración da República e os primeiros conflitos sociais e militares que marcaron a súa consolidación. Máis que unha simple narración de feitos, a obra pretende explicar como Roma alcanzou a súa grandeza e ofrecer exemplos de virtudes e defectos humanos. Para Livio, a historia é unha mestra de vida: o pasado serve para comprender o presente e para mostrar que a disciplina, a concordia e o sentido do deber foron as bases do poder romano.