Ayyappanum Koshiyum

ചുരവും ഭവാനിപ്പുഴയും ശിരുവാണിപ്പുഴയും വിശാലമായ കൃഷിയിടങ്ങളും എല്ലാം ചേർന്ന അട്ടപ്പാടിയുടെ പ്രകൃതിഭംഗിയിൽ വീഴുന്ന പകയുടെയും അഹങ്കാരത്തിന്റെയും അധികാരത്തിന്റെയും ദുരന്തമാണ് അയ്യപ്പനും കോശിയും എന്ന സിനിമ. അട്ടപ്പാടിയുടെ നാട്ടുമൊഴികളും സംഗീതവും കുടിയേറ്റത്തിന്റെ ആജ്ഞാശക്തിയുടെ മുഴക്കവുമുള്ള ഈ സിനിമ മലയാളത്തിലെ ഏറ്റവും കലാമൂല്യമുള്ള ജനപ്രിയ സിനിമയുടെ വൻ വിജയമാണ്. സച്ചി എന്ന സംവിധായകന്റെ അവസാനത്തെ സിനിമ. അയ്യപ്പനെന്ന പോലീസുകാരന്റെ ധീരതയും ശക്തിയും ധാർമ്മികതയും കോശിയുടെ പണത്തിന്റെയും അധികാരത്തിന്റെയും യൗവന ധൂർത്തുമാണ് ഈ സിനിമയുടെ സംഘർഷം. കോശിയെയും അയ്യപ്പനെയും രൂപപ്പെടുത്തിയ സച്ചിയുടെ വേർപാട് മലയാള സിനിമയ്ക്ക് ലഭിക്കുമായിരുന്ന ഒട്ടനവധി പകർന്നാട്ടങ്ങളുടെ നഷ്ടം കൂടിയാണ്. അയ്യപ്പനും കോശിയും നമ്മുടെ ദൃശ്യപഥത്തിൽ പുതിയൊരു അനുഭവമാണ്.